Ausolanek eta Kurutziaga Ikastolak jasangarritasun arloko beren lidertza indartu dute, maila goreneko Jangela Eko-Arduratsuaren ziurtagiria mantenduz

Duela urtebete, kolektibotasunei zuzendutako jatetxeetako eta ostalaritzako Ausolan enpresak, eta Kurutziaga Ikastolak urrats aitzindaria eman zuten eskola esparruko jasangarritasun arloan Bureau Veritas enpresak ematen duen Jangela Eko-Arduratsuaren ziurtagiria eskuratuta. Gaur egun, jangela horrek bere ziurtapena berretsi du, bere estandarrak mantenduz. Modu horretan, erreferente bilakatu da Espainian, eta eredu
eko-arduratsua guztiontzat posible eta onuragarria dela erakutsi du.

Beste ziurtagiri batzuetan ez bezala, Bureau Veritas enpresaren zigilua lortzeko, ezinbestekoak dira ebidentzia jarraituak eta hobekuntza etengabea. “Auditoretza hau ez da izapide hutsa. Egunero jangela eremu hezigarri, osasuntsu eta inguruarekiko konprometitua dela frogatzea dakar. Horregatik, lorpen kolektiboa da, lantalde osoaren eta komunitate hezitzaile guztiaren eginahala balioan ipintzen duena”, azpimarratu du Nuria Carbajalesek, Ausolaneko Kudeaketa Sistemen zuzendariak.

Lehendabiziko urte honetan zehar, elikagai ahalik eta gutxien alferrik galtzeari eta baliabideak optimizatzeari erreparatu zaio, besteak beste, honako neurri hauekin:

Hondakin organikoa neurtu eta murrizteko metodologia berria, egunero hondakin hori kontsumigarri eta ez kontsumigarri modura sailkatuz. Horri esker, ekintza zehatzagoak diseinatu daitezke.
Adinean aurrerago doazen ikasleak hondakinak banatu, pisatu eta kontrolatzeko prozesuan zuzenean inplikatzea, jangelaren ikuspegi pedagogikoa indartuz.
Jankideen artean erabilera bakarreko plastikoa erabat alboratzea, ontzi berrerabilgarriekin ordeztuz.
Hornitzaileekin kolaboratzea, produktuen formatuak egokitzeko eta plastikozko ontzien erabilera murrizteko.
Ikasle nagusienak “Alferrik galdutako Elikagaien Dekalogoaren Enbaxadore” izendatzea, aztura jasangarriak sustatzeko funtsezko irudi hezitzailea.
Sukaldean eta jangelan ekipamendua berritzea (marmitak, mahai beroak eta galdara), energia-efizientzia hobetzeko.

“Jasangarritasuna ez da behin ziurtatzen, egunero eraikitzen da. Jangela honek erakusten duenez, borondatea, konpromisoa eta ikuspegi hezitzailea uztartzen direnean, bidezkoagoa eta gure ingurunea gehiago errespetatzen duen eredu bateranzko pausoak eman daitezke”, nabarmendu du Urko Rodriguezek, Kurutziaga Ikastolako gerenteak.

Jasangarritasun arloan ibilbide irmotu batekin, Ausolan eta Kurutziaga Ikastolaren arteko aliantzak erakusten du eskola-jangela ikaskuntzarako eta kontzientziaziorako eremua izan daitekeela, non ekintza bakoitza lagungarri baita etorkizun arduratsuago bati so.